قصيدة الحلم لحامد زيد

تحايلت المنام الذي مثل بيتك تمرينه

وأنا اللي من تفارقنا وأنا ما غمضتلي عين

غريبة كل حلم يمر برقادي تزورينه

والأغرب كيف أحلم الحلم وأرجع وأحلمه بعدين

قبل يومين شفتك في المنام وقمت من حينه

ونمت أمس ورجع نفس المنام اللي قبل يومين

أنا اللي قبل أسافر شلت قلبي من شرايينه

تركته بايدك مثل الامانة واحفظيها زين

ترى حفظ الأمانة دين مجبورة تردينه

أجل ما لي حق اقلك حفظ الأمانة دين

مرد المكفي بيلفي ويستوفي وتوفينه

بعد ليلة ، ثلاثة ، أربعة ، عشرة ، شهر ،شهرين

إذا انت ما انت بقد الكلام اللي تقولينه

حرام أستأمنك حاجة وإذا جيت أطلبك تنسين

تخونيني وتبيني أرضى وأحد ير ضى تخونينه ؟

أنا لين جيت أخونك مع حبيبة ثانية ترضين ؟!!!

من أول ما رجعت من السفر ما شفتلك بين

وانا اللي كنت احسبك قبل أدوس أرض المطار تجين

تكونين انت اول شخص عيني تحتضن عينه

وكنت أتخيلك من زود فرحة رجعتي تبكين

وأشوفك بدمعتك حكيك وأعرفه قبل تحكين

وأجيب أحلى من اللي بتحكينه وأتركك تحكين

تقولين الوطن نور وأقول بنور مضوينه

تقوليلي غديت أحلى وأقول عيونك الحلوين

كلام نام بشفاهك وخفتي لا تصحينه

ذخرتيه للغرام اللي ينام ويتركك تصحين

تغانمتي غيابي لين رجحتي موازينه

تعلم من ايدك لمس الكفوف وعلمك تجفين

وليتك لاقيتي به شي فيني ما تلاقينه

مو هو بغرور لكن أخابرك مالك أمل تلقين

تغافلك بغلى ولا الحلى ماهو بزينة

تزينه الصور بس الصحيح ابن الحلال زوين

وانا مالي بناقص عنه يوم انك تبدينه

نصيبي هو نصيبي لو يسددها من الصوبين

قنوع بمظهري والسّم ما يذبح ثعابينه

على قول المثل مالي حلو لكني مالي شين

إذا أهداك الزهر مرة فأنا أهديتك بساتينه

وإذا ألهاك بفرح ليلة فأنا تهت لبكاك سنين

وإذا استضعفتك املاكه وشتتك ملايينه

انا حتى فتات الخبزة أقسمها معك نصين

طموحي بس أجي وأظفر بشي تستحقينه

تدينته تسلفته سرقته... مو مهم منين

 كأني من كثر ما أرضى بكل اللي تمنينه

لو إنك تطلبين الله يعنيني بقول آمين

أنا ماألعب على الحبيلن وقت الطيش وسنينه

تبين الحين يوم إني كبرت ألعب على الحبيلين !!!

ترى عند الحضر بالذات عيب اللي تسوينه

حلاتك لاعشقتيني تعشقيني ليوم الدين

غرام مسكن ضلوعه حشيمة من مجانينه

جفى يجمع معزتنا ولا عشق يذل اثنين

كثار اللي تحدوني وقالولي تحبينه

أمانة لا تخليني صغير بعينهم ... تكفين

لأني كل ماقالوا تخون أقول مسكينة

عليك الله أمانة علميهم من هو المسكين

أنا خايف لين طاح الجمل تكثر سكاكينه

وانا ما عادت ضلوعي تحمل طعنة السكين

مثل ماقالوا المكتوب واضح من عناوينه

لو أرحل منك للغربة ... بسافر من ظلامك وين ؟!

كفاية كل حلم يمر في رقادي تزورينه

كفاية من تفارقنا وأنا ما غمضتلي عين

قبل يومين شفتك بالمنام وقمت من حينه

ونمت أمس ورجع نفس المنام اللي قبل يومين