مختلف

مِختلف ..
غربة الروح وأهلها ..
ضِحكها وحُرقة زعلها
بعض ايامي وكِلها
عزّةٍ في النفس لامن كابرت دمعة ، وذُلها ..
قاتلي وتفيض بعيونك براءة
ومحترفْ ..
مِختلفْ ...
** ** **

يوم أنا شفتك عرفت ان شيْ من حُولي اختلفْ
وان فيني بعض شيٍّ مختلف .. صعب الوصفْ
في خفوقي زادت الخفقات خفقة
وكل زينٍ شاهدَه ظنّه من اللهفات حقّـه !
وكل ما مرّيت رايد يخلع الصدر ويرفّ
وان سألته وِش بلانا اليوم ؟ قلّي ما اعرفْ
بس مِختلف ..
** ** **
ما انت غير الناس لكن مختلفْ
كل زين يمرّ خطواته مشي
وانت خطواتك عزفْ
كل زين شفت من هذا وذاكْ
وكل سحر عيون شفته من سواكْ
فتنةٍ أسر اللواحظ ..
لكن عيونك هلاكْ
أوّله من نظرتك بس تاخذ القلب وتروح
وثانية تروّض جفا العقل الجموح
وثالثة لو ما طغت ، تلقى لها العاشق وقفْ
وبالذي قد ضاع من عمره قبل شوفك حلفْ
مثل حسنك ما رأت عيني ولا دمعي على حِسنٍ نزفْ
كل نظرة من عيونك تفتديها الحُور في الجنة بألِفْ
يكسرن كل المرايا ويهمسن : شي مختلفْ

** ** **
كيف صرت بيوم أفهم بالسهرْ ؟ !
وكيف صرت اشوف جيّاتك رزقْ
وكيف صرت اشوف روحاتك قَدرْ ؟!
وكيف كنت اسمع عن اشياءٍ وصارتْ ..
بعدما كانت سَمَعْ ..
إن قلبي من تمرّ ، مني يقعْ
ومن تغيب ، الروح تطفو في حدق عيني دمعْ
واتمنى لو أسِجنك في فضا صدري قلبْ
تحُوطَك القضبان ضِلعٍ حانيٍ يشدّه ضِلِعْ
وليه أشوفك كل ما تظلُم عدلْ ؟!
وليه أشك انك بشر ...
من أشوف – استغفر الله – كل ما فيك اكتملْ ..
وليه من طبعك سريعٍ بالملل ما اقدر أملْ ؟!
وليه لامِن جيت أوصّف ينقفل – غير العوايد – كل دربٍ للوصف ؟
أفقد الكلمات ويَعجز عالورق حبر وحرِفْ
وتخجل اشعاري وتضرب للعجز كفٍ بكفْ
وتخشع وهمسٍ تقلّي :
شوف انت اللي تشوفْ
اما أنا هالمرة اعفيني و والله أعترفْ
شي مختِلِفْ !!